চাকমা কবিতা- আহভিলেচ

আহভিলেচ

✍️মেঘুলো চাকমা

ভেইয়ে ভেইয়ে লারেই চলের,

কদ’ পরান খেই দেদি।

আমন’ ভালেদ ইক্কে বানা,

গম বন্দাউন পুরেলাক্ লুগ্দি।

মা ভাচ্ লারিয়ে নেই আর

তোনপিলে সান দেদন ঘাদি‌।

নিজ ভাচ্ সেনে দিক্কাউলো

আযি যেবঅ্ যাদিমাদি।

দিন দিন ভেক্ চদরভদর

চিন লুগে যার গঙ্ দি।

রীদিসুদোম চেনে দেদন

মাত্তলে দুচ্ছে কাম’দি।

রং-তামাজায় আওল-পাওল

সঙ্ পদত পরন্ বিজিদি।

সিয়ানি বিলি জাদর সুধোম

সেনে পালান ঝাকবুদি।

বুড়োবুড়িত্তুন বর লোনেই

আদে-কোদালে গাদেই দি;

আদামঝারা কুরোরে চোল খাবানা,

ইক্কু আমলর বিঝু দিনোত,

কয়জন পারিবাক দেগেই দি!

কোচপানা দ নেই আর

কুধু যিয়েগোই লুগ্দি,

মান্যের ভালেদ দেই নপারন

নিত্য চিদে,কেনে লামেবাক্ তলেন্দি।

ঘরে-দোরে টেঙা পোজেই

এক্কা খেই-দেই পারিলে,

সমাচ্চে-কুদুম্মো ছয়সাগচ্চে;

কু’দিনোত নপেবে ধা’গন্দি।

ভালেদি কামত সমার কোই?

বন্নাঙ আরঅ্ খেই পেবে।

পুন্ডিকগিরি কোলিয়ে বেচ্

রাগ গচ্ গচ্ আমিজে।

এক্কান কধা কনপাগে

যুনি পরে ছিদি

এক্কানত্তুন আজারান অয়োই,

কে’না এক্কা যায় নি!

জাদর মাধা জাদেই খাদন,

জাদ ভালেদি নাঙ দি।

ধর্ম নাঙে ব্যবসা চলের,

আন্দাজে বানা পালান্দে।

আযল ধর্ম কয়জন চিনন

আরঅ্ বাজান্ধে ছোল,

এক্কোত্তুন এক্কো পুন্ডিক বেচ্

কধাবাত্তা নেইদে দোল।

যাত্তুন আগে গোদেল সেদাম

নগরন চিদে গমানি,

সেদাম নেইয়েই কয়দিন গত্ত

থিদিরথাদার গুরি কামানি।

রাগ,লোভ,ইংজে,পিজুম

ভরণ গুরি মনানত্,

কেনে চুলিবোঙ,কেনে দিযেবঙ্

দেগিদেই সান সবনত্!!!

Publication author

offline 4 years

Meghulo

0

I am a literature lover. I love reading poems, stories, novels.And I never hesitate to get a taste of poetry recitation, even though I am not a vocalist.

Comments: 0Publics: 1Registration: 26-03-2021